ABESBATZAREN BATUTAN TXANDAKETA, BAZKIDEEN KONTZERTUAN

2009/01/01
Urtarrilaren 10ean, Biotz Alai Abesbatzak urteroko Bazkideen Kontzertua egingo du. XXXIX. edizioa izango da. Oraingo honetan, kontzertua Bariko San Nikolas Elizan izango da, Algortan, Getxo Antzokia eraitsita baitago. Kontzertua Javier Oyarzabalen despedida izango da. Abesbatzako zuzendaria izan da azken 20 urteetan, eta lan arazoengatik kargua utzi behar du. 1989ko urtarrilean, bazkideen beste kontzertu batean berak hartu zuen zuzendaritza, Juan José Gainzak utzi zuenean. Erabakia behin-behinekoa izan zen, baina azkenean 20 urte eman zituen abesbatzarentzat lanean eta arrakastak, lana eta bizipen mordoa konpartitzen. Abesbatzaren oroimenean geratuko dira betirako. Biotz Alairen bihotzean, beti egongo da txoko bat gure zuzendariarentzat.
Aurrerantzean, Josu Soldevilla izango da abesbatzako zuzendaria, ospe handiko musikaria. Bere oraingo abesbatza lanak baztertuko ditu eta Biotz Alairen zuzendaritzan sartuko da buru-belarri. Abesbatzarekin arrakasta handia izatea opa diogu, baita bere “batutaren” iraupena aurrekoena bezain luzea eta emankorra izan dadila.
Bazkideen kontzertua arratsaldeko zortzietan hasiko da. Amaitzen denean, Bazkideen Afaria egingo dugu, Igeretxe Hotelean.
|